2.500 lagunek eman du izena Donostiako 15K Salto Klasikoaren 26. ediziorako

Aurtengoan, Itsasoko Laguntza Humanitarioa elkartearentzako izango da 15K lasterketaren dortsal solidarioa, eta ADEMGI Esklerosi Anizkoitzaren Gipuzkoako Elkartearentzako, berriz, 5K lasterketarena; Salto System enpresak ekarpen gehigarria egingo du

Iritsi zaigu berriro Donostiako 15K Salto Klasikoa, 26. edizioa dagoeneko, Donostiako lasterketarik inklusiboena eta Euskadiko inklusiboenetakoa. Datorren igandean, urriak 22, Donostiako kaleak beteko dituzte bederatzi nazionalitate ezberdinetako (Espainia, Frantzia, Erresuma Batua, Italia, Alemania, Irlanda, Danimarka, Amerikako Estatu Batuak eta Hegoafrika) 2.500 parte-hartzailek (% 32 emakumeak): 1.979 korrikalarik (parte-hartzaile guztien % 88,9), 268 rollerrek eta mugikortasun urriko sei atletak 15 kilometroko distantzia klasikoan, eta 286 korrikalarik 5K lasterketan; horietatik % 25 Espainiako beste autonomia erkidego batzuetatik etorriko dira, eta % 10 atzerritik.

Rollerren modalitatean, gainera, bigarren urtez jarraian hartuko du parte Patxi Peula lineako patinaketan munduko txapeldunak. Halaber, lehen aldiz parte hartuko du Aura Quintana patinatzaile kolonbiarrak; World InLine Cup txapelketa irabazi du aurten Berlingo Maratoian; norgehiagoka bizia jokatuko du lasterketaren azkeneko bi edizioetan txapeldun izan den Idoia Martínez de la Fuente gasteiztarrarekin.

Elkartasuna ezaugarri

2023. urte honetan, lasterketan inklusibitatea sustatzeko, sei kirolarik hartuko dute parte handbike-ean 15K proban, horietako hiru gorrak eta desgaitasun organikoa duen beste bat; bost kilometroko distantzia laburrean, berriz, berriro hartuko dute parte Real Sociedadeko LaLiga Genuine futbol-taldeko jokalariek.

Halaber, 15K distantziako izen-emateko bakoitzeko euro bateko dortsal solidarioa Itsasoko Laguntza Humanitarioa elkarteari emango zaio; bost kilometroko lasterketakoa, berriz, Esklerosi Anizkoitzaren Gipuzkoako Elkarteari. Salto Systems ekimen honetako babesle nagusiak, gainera, 5.000 euroko ekarpen gehigarria egingo dio elkarte horri berari.

Emakumeen parte-hartze handia eta elastiko berria

Donostiako Salto 15K Klasikoak emakumeei zuzendutako entrenamenduak antolatu ditu martxoaz geroztik, Gipuzkoako Foru Aldundiaren Emakumeok Mugimenduan programari esker; 10 saio egin dira Susana Ruiz atleta ohiaren gidaritzapean, 5K distantzia prestatzeko. 143 emakumek hartu du parte ekimenean, eta horietako 25ek baieztatu dute datorren urriaren 22an kirol-oinetakoak jantzi eta lasterketan parte hartzera animatzeko balio izan diela.

Edizio honetan, parte-hartzaileen % 32 emakumeak izango dira. Hau da, 791 emakume izango ditugu proban, eta nabarmentzekoa da roller modalitatea, parte-hartzaileen % 41 emakumeak izango baitira; bost kilometroko distantzian, berriz, gizonezko baino emakumezko gehiagok hartuko du parte. Klasikoan parte hartuko duten emakume guztien % 43,35ek distantzia labur hori jokatuko du.

Bestalde, iazko edizioko diseinu berari eutsiz, kolore berria izango du Donostiako Salto 15K Klasikoaren 26. edizioko elastikoak; urdin turkesa izango da, eta 15 kilometroko lasterketan hiru modalitateetan zein bost kilometroko lasterketan parte hartzen duten guztiek jantziko dute. Iaz bezala, lasterketaren antolatzaileek ingurumenarekin duten konpromisoaren erakusgarri, elastikoek ECO zigilua izango dute aurten ere; zigilu horrek bermatzen du jatorri organikoko eta/edo birziklatutako materialen eginda daudela, jasangarritasuna sustatzeko eta ingurunea zaintzeko helburuz.

9:45ean ekingo zaio Klasikoari; ordu horretan abiatuko da bost kilometroko proba. 10:00etan hasiko da 15K: Rollerrak irtengo dira lehendabizi, eta 10 minutu geroago, 10:10ean, mugikortasun murriztua duten atleten txanda izango da.  10:15ean, berriz, lasterketako probarik jendetsuena hasiko da, distantzia tradizionaleko korrikalarientzako lasterketa. Madril Hiribidean egongo da irteera-puntua eta handik metro gutxira, berriz, helmuga, Anoetako estadio txikian; zirkuitu homologatua du lasterketak, ia erabat laua eta ibilgailuentzako itxita egongo dena. Kronoak arduratuko da kronometratze elektronikoaz, eta Gipuzkoako Atletismo Federazioko epaileak, berriz, denborak eskuz kronometratzeaz.